மூன்றெழுத்தில் ஒரு முத்தான கவிதை

அன்னை மூன்றெழுத்தில் ஒரு முத்தான கவிதை

முன்னூறு நாள்சுமந்து

முகவரியைத் தருவதற்கு

அங்கமெலாம் நொந்து

அவதிகள் தான்பட்டு

பிரசவ வலியாலே

புழுவாக துடிதுடித்து

மரணத்தின் வாயில்சென்று

மறுபிறவி எடுத்தவள்.

உதிரத்தைப் பாலாக்கி

உயிரூட்டி வளர்த்தவள்

துன்பங்கள் பலவுற்று - கண்

துஞ்சாது காத்தவள்

வாந்தியும், மலசல

அசுத்தமும் சகித்தவள் _ பிள்ளை

வாழ்வே சதமென்று

சகலமும் பொறுத்தவள்.

தேவர்க்கும் கிட்டாத

தாலாட்டு படித்தவள்

தேனினும் இனியநம்

மழலையை இரசித்தவள்

தியாக தீபமாய்

மெழுகெனத் தேய்ந்தவள்

தன்சுகம் பாராது

உழைத்துழைத்து ஓய்ந்தவள்.

ஈரைந்து மாதபந்தம்

ஈடில்லா நமது சொந்தம்

எல்லையில்லா அன்புகாட்டி

கொள்ளைகொண்ட இனியகாந்தம் - அந்தக்

கருணைப் பெருங்கடலை

கண்கண்ட தெய்வத்தை

காப்பகத்தில் விடுபவர்கள்

கண்ணிருந்தும் குருடர்களே!

- நன்றிகளுடன் திருமதி. அமுதமணி கல்யாண சுந்தரம் அவர்கள்